每日一問：幾時先唔會甩大牙？
第十一日出指時間：（密切留意）
星期日, 11月 11, 2007
妙法流行曲（一）─ 靈鷲山下
靈鷲山下（原版：富士山下）
曲：Christopher Chak（澤日生）
詞：愚人
編：陳珀 / C.Y. Kong
監：Alvin Leong
繁盛了幾里噪音 感官收窄幾分
這一生眾生相流逝了歡欣
忘掉了心有清雅 怎麼始終牽掛
苦心指責身邊的一切傻瓜
原諒我感慨世假 真心只當笑話
雖則觀破虛耗時間業玩詐
凡俗世可笑可怕 彼此終必火化
應否倚靠虛空中真理淨化
＊人生摸不透星宿 靠怎去運行十世不朽
要考究必先懂心醉賞宇宙
沉淪在窄巷漫遊 無明在開拓地球
旁人萌嘆意世態未得參透
嘗一下抽身感覺 審察日常玩世多透
醬江裡找不到高智商眼眸
靈鷲活化盡樂遊 貧臨地醒覺便回首
我浪跡講究 要跨過境界穿州 信念會得救＊
愚人節奢盼太短 公式感覺轉圈
井底之輩貪醉受俗世揀選
凝望往昔我方串 精心揣摩規勸
苦苦哀勸將擺款軀殼劃損
人活到幾歲算短 不需深究耗損
鮮花開了衰老後無謂預算
常住永久已不斷 冬天走了春暖
福德之旅一早走畢了無怨
Repeat（＊）＊
你還嫌不夠 我哼這題目豐收 送贈你參透
（原曲ＭＶ：富士山下）
後記：自從暑假每日一指停罷拍攝後，便想度些新料頂住先。原先８月頭出的這個，一寫便是三個多月，才能填出人生的第一首歌詞，見笑了。
星期四, 10月 18, 2007
港式二處三會
很滿足。
真的很滿足。
久逢甘露的滿足。
心情一掃而空，重拾一種已於單調的忙碌中遺忘了的滿足。
從未試過看一套劇，由頭笑到落尾，
仲要笑到屁股成六、七十度咁高溫，
可謂正宗高溫愚家。
亦從未試過笑到冇晒力；甚至去到癲峰的境界......頭都痛埋！
但實在感到猶如再進入虛空會的感覺，
與多寶釋尊二佛浮於半空，
感受大宇宙的生命力般；
感覺很滿足、很喜悅、很回味、很有價值。
以往去看劇，我已經感受到這種喜悅。
最記得當年首演的《男人之虎》（之後嗰ｄ畀詹sir做到爛晒）
成套劇論盡男人眾生百態；
到埋尾一幕播片，片中的詹sir 拿出一「ang」虎標萬金油一搽，
即刻成個人醒神晒！
走之時更同人渣康傾談，當晚的情景猶如今晚。
因為都是在Art Centre睇；都是由Art Centre同一條路走。
講起來都已經是兩年半前的事，
但記憶猶新，虛空的感覺常在，可謂常樂我正！
今晚重逢，並非詹sir 個戲，而是W創作社勾搭風車草的《小人國》。
這戲亦是論盡香港人心中的「抵」小...市民的心態。
從為投訴而投訴反岐視的岐視人的虛偽人，
到假大空為執正而執正、淨係掛住排長靚的家長式管治生態，
再再到地鐵恆生即等人、等人即恆生的眾生相，
再再再到港男索女人生幾十載大激鬥摔角擂台癡纏
看到各「行」各「業」偽君子、極幼稚和超低能的小人心態。
埋門來一濟向溫情猶在、小人可愛的《香港82》致敬的零七版復刻演繹，
再次提醒港人一個點：人是立體的，小人也需要小得有價值、有睇頭；
最後一隻百老匯的小型歌舞打完場。
看罷，心裡第一個感覺，除了正式籮柚開花、頭暈身興外，
還有就是感到人生異常滿足。
心裡唸唸有詞：
「一套劇居然勝過一個所謂為人生取得勝利、
幸福卻齋做死板口號式的HKSGI。
除咗打破多個月來的極度沉悶而單調的港式生活外，
亦深深感受到咁差辛苦搞個文化節，
嘢嘢都畀嗰班井底怕死之輩阻住晒，
而令好多人冇晒人生樂趣、冇晒喜悅、消沉至極。
我覺得要得到絕對幸福，
未必需要遁住HKSGI入面嘅主流活動先可以攞得到，
反而睇一套精彩絕倫的劇，緊記住個法的核心價值來解讀，
然後避免劇內的人生盲點，踏實咁實踐裡面的正面思想，
套入日常生活入面去行，亦可以達到多年來活動的效果。
咁仲唔係修行緊佛法即生活，生活即佛法的不二法則咩？」
所以，我決意會力撐阿五青年部以及多元化廣布模式！
我亦會搵志同道合的老友，齊齊從扎根開始，一齊玩盡廣布。
星期三, 6月 20, 2007
每日點醒理系列：《每日一指》
每日一指，繼承信心即生活的方針，跟大家介紹一些不是很深但很甘的指導，是要用全新去演繹，是全新的解釋。從地底的角度，觀摩內裡的宇宙性。每週兩日出品，讓你每日用心做人，每刻笑看人生。
星期二, 4月 17, 2007
雜睇回憶學會事 ＩＩ之零三好玩 （上）
零二至零三年度的中學部，是我最訓身搞事的時期。零二年暑假，天兄以訓身姿態畢業中學部後，後繼的重任便落在我與文健身上。那年我非常記得，完成中總之後，在人離留空的講堂內，只剩下馬仔、天兄與文健三人，我就在講堂遠眺入內。馬仔與天兄相擁道謝，感激大家過去一年不離不棄、共同奮戰的黃金歲月。接著天兄將培育的接力捧交到文健手上，當下大家心裡的那份師弟之情，已表露在那幾十秒的淚滴啃咽之中，感激之話已無法在言語上交待，過了數分鐘，第一個開口的便是文健。他決意要將前人種田後人耕的心意發揚光大，誓要培育出阿五的出色後繼來答謝天兄盡心盡力培育自己的心血。
站在出面的我，沒有流淚，也沒有衝動進內，更沒有任何表示在臉上，只是呆若木雞站在外，非常硬頸地跟自己說：「一定會培育出出色的後繼，帶領中學部進入一個新時代來答謝你帶我睇到一個新世界，毫無架子咁將自己的所有知識與智慧傾囊相授，將我變成咗另一個人。多謝你...我做唔到，我就無資格講任何嘢。」答謝之意我強抉地不說，沒有成績我便不會說任何未兌現的承諾，是我當時的心情......
之後一年的活動，我便全心全意放在中學部的各種推行上，從最初跟文健在我家中共同定立目標，接著開展培育大計，且同期團火燒得火紅紅，又加入Axis，又狂撐多項活動，總之唔揚唔威唔死心（當然此威不同彼威，我是希望大家明白創意活動並非搞事破壞，希望大家望多些個世界原來有好多新奇好玩之事等著大家；亦當然唔會一時三刻變革到）。當中加入Axis時，自己建議了十多項創新而又好玩的搞事動作，做足一切革新的準備，務求大家均學得開心，玩得認真，發揮出最攞命的創意實踐廣布宏願。後來一路路行落去，與文健合作下，才發現出自己原來越來越無料，雷聲大雨點小，合作開始出現問題，且同期沙士爆發，火紅之心便急轉直下。但那年六月過後我便跟自己說：「承諾過嘅嘢一定要兌現！」那時我開始撻番著個計，心想：「既然要搞，就要搞到最勁」於是零三暑期活動開始了。那時我還未有任何工作，全身投入了學會一整年。那就與文健再次上心合作，共同度橋起勢開壇。
那年是分開某幾個本部合作一齊搞，阿五便與合作無間東區同窗阿九合作。至於主題上是「師弟不二精神之傳承」那年我們抽到學術範疇如何傳承師弟不二之精神。甫開始與文健度橋，度到嘔晒白泡都未能度到如何開頭，用了一日時間一齊度一齊傾，大家均用心認真chur住咁去，但都是無事發生。大家無橋之際，餐廳文館兩邊兜兜轉轉之後，奇妙之事終於發生。
我與文健無橋時便往常無聊閒談，廢o翕扮笨七。就在亂咁o翕的情況下，文健說了一條幾好玩又啱駛的大橋，但他只是純粹貪玩不當一回事，但我覺得非常得，就食住條水即用開壇分工搞。
大橋之意是講述孔子兩個弟子的後人們開壇爭論誰是孔子遺產的真正繼承者而軒起了社會風波。名為「孔子遺產爭鬥案」，簡稱「孔遺案」。我負責的是模彷城市追擊陳健康事件式社會專題探題的短片製作；文健就負責辯論大會的現場話劇。
篇幅太多，詳細情形及其後續感受，下回分解。現在先來回味一下我負責的短片部份及相關詳細「背景」資料。
短片部份：扎根電視台特備節目《無孔不入》
P.S.: 「扎根」二字、「根」字LOGO及BLOG名之出現便基於此事。
星期日, 4月 15, 2007
估你唔到產品系列、成立二周年國際大舊事回顧
經過一整年冇一次估你得到的多項創新而冇品的產品姿姿整整地推陳出新後，反應騎呢百佳，超出無聊的預期，銷量直迫雙白痴數字。過去一年，產品研製主要採用天真雪蓮提煉而成的冷智慧精華素，混和邊皮碎料，與笨蛋一起拂到起漿，再放入妾氏(cheap's)百九幾萬度低能溫社會大熔爐，配以文塞火烤焗，最後將熱燙的製成品植入民間灘凍，隔開沉澱的人渣，凝固成頂你個世的堅硬核心，便成為估你唔到產品。
多得各路奇形怪狀的客戶支持，估你唔到概念得以植根人心，才能九唔搭八咁多件。
(1)撈得起云吞
隨自意撈偏野的時候到了，終於發覺自家餡才是最有heart，包埋塊中道粉皮，成了撈得起云吞！
(2)洗燥底浴巾
歷盡江湖游水，常駐舊式燥堂，出名底子熱氣。每逢落水一浸，白布包實黑道。一鍋心水，盡洗燥底，令你重獲身新，洗燥底浴巾真有效！
(3)黐Ｑ膠花
一身浮雕襟花，立場浮跨；不懂名牌立品，冗帶全身浮花。價格浮面，從未內化。圣誕西節，送禮自用，唦呢弄眾。頭載一襟黐Ｑ膠花，懶潮爆人的身份象徵！
(4)笨蕉‧西門子
台海那條最引以為傲的笨蕉，傾盡最笨招數，購入德仔那道最引以為鑑的西門，開盡最西門市。前賓後西，扯盡發威。笨蕉一射入西門，搞出一時佳話的笨孩子。笨蕉‧西門子。丫！你係好野。
(5)嗰類型人
寒流襲港，凍疆未生埋的腦荀；冰塊團積荀位，呈黐膠著狀態，壓著醒悟中樞神經，變成黐膠線。冷型態度面市，品味黐埋一舊，衣著另類平凡，醒悟苛爾蒙失調，越扮梵越平凡。忘了自己呢類，得番人地嗰類。認住嗰類型人，零捨不同！
(6)和平寬頻上心服務計劃
和平飯店總廚蔡師傅熱心推介。一經參與，福運源源不絕。特色一：和平頻寬全宇宙至大。下載世界視野、上載交流氣氛，一樣暢通無阻。特色二：月費無代價。只需付出零歧視的眼光，即可獨享零臭罵的尊重，慳慳埋埋，作為供養，功德無量。經蔡師傅推介，更送你感動流涕。在旁人士感動左喇！你呢？即刻打開心窗申請啦！
(7)101斑點狗
零七新治安，一群１０１斑點狗周街走，齊齊走到尖尖門口曬太陽，誰不知食蕉埋伏，斑點狗嚇到雞飛狗走，身上斑點冚巴冷甩晒。白白見底，黑仔淆底，食蕉過世。確係好一群１０１班被老點的狗。
(8)菜蘿果子鹽
菜蘿果子鹽，有乜熱氣，一講就玀。果子迷混，天然麻醉，令你有慾仙慾死的感覺，忘我本痛，是傷口潰爛的最佳之選！
(9)新爆笑集團
新爆笑集團，以笑為本。致力拓展梵海外市場，學術笑聲，響偏全球。笑力雄厚，信譽超玄。
(10)綕之派結撻撻神功
綕之派結撻撻神功；特色是亂Ｑ咁灑；秘技是亂差咁O翁。浮跨多變的笨蕉式，令人無所適從，六支派均給他的絕招：六指禽吹，吹到啤一聲。今日更成立了顯世武館─創價動感蠟像館。
(11)幸福股─中國廣布
在泡沬中國爆破的利好消息公布後，日蓮佛法控股入市，走勢持續上揚，拖累貪腐、反智及漠視生命的蛋散戶急據拋售，人渣指數狂瀉三個七點，帶旺整體幸福上昇。
(12)反清復明錄
中國之命途，一詞以繫之，反清復明。反對清楚，復興明確。已定性千代萬世，中國人的本質也是不變的矛盾。中國古代特色胡同也預知了未來的中國。走進胡同，如同迷失與矛盾，煎熬永遠。從現代中國人拆毁歷史文物，重建歷文文物成新歷史文物已可見一斑。
(13)格價專家黃老太
黃老太重出江湖，挑戰內地人渣海鮮價，揀選最骨質的素材，發掘低價格高風險超賤格的食品。務求嚇唔死你，都要Ｘ你老味。重出江湖至抵揀推介：油魚！
(14)Mobile Wii: Cii
Sony有PSP，按鈕式控制；Nintendo則有NDS，筆觸式狂篤；Wii卻發動全身，推出手提版Wii：Cii (黐)。；隨時隨地周街黐起上來，為反智爆忙的人度身訂做，釋放心中無限壓力，表現黐蝦殼的真我一面。
(15)精英大師
精英大師唐師長發表最新的財政預算案。重點項目是推出最新兜售稅，一系列政策贛兜住香港的零售市場，推動外資流入本港，擴闊底橫稅基，預算為褲房進注七百億神沙，亦滿足巿民有財進褲浪的訴求。唐師長亦表態會參選澳洲新一屆沙圈特首，以精英樣相一馬當先吸取外國草園奔放的管治經驗，終極目標回流參選特首，造福港人。
(16)佛利民運動
密思佛陀千百年來常思索如何使眾生幸福，終於在不知多久前領悟到末法時代必將降臨，洞悉眾生的終極生活形態是以金錢掛帥，於是發出方便力，派出自己條靚─觀音，開倉借庫，打救世人，取其名行動代號為「佛利民」，化身經濟學人，影響現世經濟深遠，讓世人悟得世界是平的。
康座哥，你係好嘢！
總於考完試了！開心到爆廠！辛苦咗兩個幾月，終於完滿地考完喇。祈求的目標再一次得到諸天的維護，將不可能變為可能的境界再上層。呢云真係唔係呃你、唔係整蠱、唔係搵笨，鐵一般的事實，福運嘢！Unbelievable...
整段期間處非繁忙卻超緊張的狀態，每日真係無乜鬆懈，日日都有溫書，但卻因為自己記性差、信心唔夠，只有搏老命起勢祈求，希望自己搵到個啱自己駛的讀書方法。唉...點不知，日日狂溫，點搞都係入唔到腦，assignment都搞完喇，個復活節都已經放完喇，咁唯有搏下集體溫書，約埋個幾個同學一齊。嘩...唔溫就由自可，一溫就扯晒火，突然間熱血渾騰，同同學一齊研究，又同時向佢哋狂講解，吸收知識的速度快咗九萬幾倍，四日內溫晒兩個幾月嚟兩科超難明、勁難記同多到爆的科目。一科專搞個客的系統發展；一科係專講IT Business strategy。
第一科畀條社會楝樑阿sir 用賤呢域策略(generic strategy)好賤地老點咗；話會出的題目，而我又最熟嗰喳，冚把冷冇出到，於是考完之後我拉嘢喇！得三乘識答....幸好後來知道大家均拉嘢，我估拉番條据扶應該合格。到第二科考試，簡直係直倒皇龍，貼的題目熟到爆的情況下，答中咗八乘答案，可惜嗰兩乘因為緊張未能發揮最大水準，但我已經非常開心。
今日睇番，一路祈願多月希望搵到自己啱駛的方法，居然喺咁樣的情況下搵到，以後更難的科目我都冇有怕。只要計劃周詳，keep住個勢共同奮鬥，且早d 開波，包保一定可以以最好的成績畢業，畀身邊的同學睇吓呢個法的威力！最終一齊以最好的成績畢業！
阿......康座哥，做人呢單嘢掂唔掂，呢鋪真係靠你喇......吖！頂！咪即係靠自己，自己友，繼續去吧！成就大願，指日可待！
星期三, 4月 04, 2007
一念三年遊樂廣布起義運動出發式
一個好年淨化人間革命運動終於大功告成。抗戰了一年，每日風雨不改粒幾鐘堅守愚式題目陣地。愚人局勢已進入青銅宿命轉換的戒嚴階段，要繼續緊守這一戒律「實踐是檢視佛法的唯一標準！」，直到擊破魔軍的宿命陣形！
現在，擴大信心戰線，不止愚人一人，加入阿五戰友團。於是，一念三年遊樂廣布起義運動正式展開了。目標是2010年進入大局，手握最強兵馬，改寫廣布新一頁。究竟是多元改革，還是多餘改革，生死繫於今年。現需雲集各路五人幫英雄，擺上阿五仝人陣，共同使出南無妙法蓮華戟！擊破死守無明的冥頑不靈界的理事團及其一眾封印幹部。
香港學會已進入成住壞空的「壞」之階段，尚欠東風呼嘯天時、地涌利、阿五人和便能造就「空」的再次出現。今次不再是愚人一人之事，是關乎法令久住之事。大家必需緊守師弟不二之崗位，蓄團結之勢待發。來吧！阿五人來誓願吧！成為遊樂廣布之先鋒，讓願景誕生，一起投入三年零三個月的唱題運動吧！
星期一, 4月 02, 2007
一個好年淨化人間革命運動收水式、淨化人間
堅持了年多，終於在零七年三月三十一日晚捱眼訓都在指定限期前完了。今次「一個好年淨化人間革命運動」比「百日信心維新運動」的平日唱題數多了差不多一倍─從60分鐘加至105分鐘；日子更多出了兩倍幾─從100日加至1年。
兩次的努力均達到了預定題名的效用。第一次真的能掌握到如何維持到自己不輸給環境的信心；第二次亦能參透出如何從信行學上淨化自己的人間生命邁向人間革命的方法。雖然未能真正跳脫自己的執著宿命，但已逐步找到了可靠的方法，只欠苦戰的耐性而已。
比起百日維新，一個好年的題目力量似乎讓我窺看到生命的底層存在的意義，逐漸明白一個人的人間革命是必先建基於自己的性格、生活習慣及自我的一套來審視自己與外在環境的差距，然後列出自己的強弱之處和外在的機遇及威脅，在有限的時間裡把生活平衡發展。趕急的弱點先行彌補；長遠的發展保持建設。外在的提點或意見只是作為參考，啱使的便融合在自己的一套上，一個英文就最易明了─customization。
老實說，在一般人眼中，這些只是無甚特別的常理，但在愚人來說，以往是自知而不知怎行，現在卻知行而需步步苦行。革命的確不是請客食飯的假大空，是揼石仔的基礎建設。地機穩，你上蓋成喳見人的部份喜歡怎樣便可怎樣。似乎改其行必先知其行，才真正知道怎樣行。
起初萌生此六字「淨化人間革命」只是亂來，現在似乎悟達出淨化人間之意義何在；又對人間革命之意義的瞭解立體了。
現在再來第三回更駭人的千日唱題運動：一念三年遊樂廣布起義運動
四月一日愚人原點之日─愚人節，正式發動。
肥西事務所 第三回：唐生取西經
唐生：「其實係咁嘅…（唔奈煩）唉…算喇，都係費鬼事講喇，（扮唔在乎）濕碎嘢嚟架啫。唉…又有客喇，又要招呼人，唔講喇！」
客人甲：「一壺普洱。吖…啲老味都幾靚啊，畀嗰碟我吖，唔該！」
唐生：「（雙手大力齊放，態度敷衍）嗱…普洱老味。」
客人甲：「喂…有冇搞錯啊！…」
唐生：「唏…冇搞錯！（態度懶散）講多兩隻字好辛苦架。唏…你咪鬼理我o翕咩啦，啲嘢好食就得啦！嗱…記住！好食就得喇。」
（唐生隨即走開）
客人甲：「（向客人乙講）嘩…呢度啲服務乜咁差嘅。噓…下次都唔嚟喇。」
客人乙：「睇佢個樣唔係畀老婆飛咩…」
偉哥：「吖，不愧係唐生啊，一貫闊佬懶理嘅風格。肥西哥，呢啲就係唐老板嘅風範，幾有氣勢啊！好嘢！小弟甘拜下風。」
唐生：「唏…搵食啫…犯法啊！」
肥西：「唐生，我知點解你話悶喇。」
偉哥：「嘩…不愧係肥西哥，咁都畀你睇到啲嘢，好嘢！」
唐生：「哎…肥西，你咁嘅樣…我…好難做加嘛」
肥西：「即係又唔係話想令你難做，只係睇吓隻大便品點幫到你啫。」
唐生：「哎…算喇算喇！我講就講喺啦…我間唔史都會漏吓啲客傾吓計，點知佢哋吖…撞鬼佢，個個唔鬼騷我架喎，我都唔明點解架喎…」
偉哥：「唏…悶咪吓…上吓大陸囉。」
唐生：「嗰範我唔悶啊！日日都有…」
偉哥：「吖…咁又係，你啱你啱，睇阿唐太都知，成日都春光滿面笑騎騎…」
肥西：「你對唐太講嘢嗰陣，佢有冇啲咁嘅反應吖？」
唐生：「吓？我對住咪又係咁，佢有乜反應啫，咪又係成日笑騎騎…講嘢同我一樣大大聲，好有氣勢咁囉。」
偉哥：「吖…好嘢啊！夫妻最高境界就係一擔擔，唔係點樣夫妻檔搞呢間唐氏綜合盞搞得咁掂呢。」
肥西：「咁唔怪得啦！原來你老婆又係咁…」
唐生：「吓？即係點呀…」
肥西：「你哋講嘢嗰陣，係咪冇乜點理人感受咁呢？」
唐生：「吖！係喎！唔講又唔覺喎…我哋不嬲都係咁架啦。有乜嘢啫！冇乜嘢格。」
肥西：「咁人哋就唔係咁諗架，人哋會覺得你嘅態度唔好，就算你心唔係咁諗都會覺得你唔好囉。」
唐生：「嘩…我講咗幾廿年，一吓子好難改架喎。我見我嘅生意又無乜點差過，邊會諗埋呢啲嘢啫，係咪先？」
肥西：「所以隻大便品的確好啱你駛。」
唐生：「哎，講番轉頭，頭先聽到阿偉哥仔講嗰喳嘢，唔怪得突然間嗰刻我覺得我好需要呢樣嘢啦！」
肥西：「無錯！佢另一個特性就係幫你通完個腦、排出毒素之後，就係令你個人通情達理。大便品嘅形成係集合二千年幾嘅十方豬肺、六菠蘿蜜糖、二煮三雜繪多種配方，經歷過無數嘅人周圍擺，搞到封晒塵嘅秘方餚製而成。所以乜人都啱食，幾時都啱塞。因為佢入到體內，識得自動調節，配合你嘅狀況幫你通到清為止。尤其家吓啲人咁反智，補一補番個腦，睿智重現，返回原點，尤其啱用。」
唐生：「吖，肥西，你把口係得嘅。咁你即係整番兩箱嚟，就算食完唔變，起碼個人都安心啲。吖，見你有jackso畀我，送番味鬆脆撚化嘅油炸唐老鴨過你食。」
肥西：「多謝晒喎！唐生。」
唐生：「咪同我客氣啦！肥西！」
偉哥：「大家咁高興，就隊番杯喇！」
眾人：「飲杯！」
星期日, 4月 01, 2007
愚人節（上）之回顧淨化之一年（上）
咁快又一年喇！上年猶記得搭正四月一寫了一篇對愚人節的看法，還對號入座地慶祝「生日」 ，又side track這個世界之愚人多的是。
一年過去喇，一個好年淨化人間革命唱題運動剛好今日完成，我誓必要寫回一篇收水式來慶賀這一年的成長，必需隆重其事，另案處理。
一年的時間，說長不長，說短也可以發生很多事；於我來說，沒有太大的轉變或驚喜。唯一不同的是認識了一些新朋友Leonie、Martin；找到份新工作，但也是份無聊的工作，沒有顯注的分別，還要對住個廢柴上司；即使有機會練習英語，也無心機，日日在渴望找到份心水工作，惜實力未夠。算啦...一切只有拜托題目之外也沒有甚可做...還有就是讀回了書，又重新讀degree，今次有題目搭救下，總算能捱得住，自己的實力、見識或經歷有多，自己最清楚，即使盡了力也很辛苦、很灰，常常覺得自己的前途也沒甚可言。只因我不是一個讀書的材料，但宿命驅使下，自己非常喜歡看書、思考，又不想給人看不起，更不想一世也是這樣過活。唯有現在出盡阿媽奶力繼續堅持著，看看自己有否能力衝破一切混亂腦袋的困難，成就一個理性、冷靜及邏輯的腦袋面世。
老實說，大家都常鼓勵我寫文章很好，有潛質，但我總認為寫得很差，不外如是，繼續去寫只因為我喜歡寫出腦入面好多奇型怪狀的想法出來，不是我有才華。我依舊看不到自己的將來應怎樣行，也覺得自己還是甚麼也搞不懂。表面上很成長，但查實真的與現實不符，心底還是很灰，前途沒有把握，實力沒有提昇，信心何在。因此，每每在鼓勵他人時，自己都在慚愧著自己何得何能鼓勵人。以往，我會很頹；現在也不理太多，為人幸福之事，搏一搏，有題目坐陣，點都有些成績出來的。望自己條命「生性」點，題目同我搞番好佢，我家陣常想著一個諗法：「若然我沒有改變，把不可能變為可能，我信個來把鬼麼。」我深信必能透過題目人間革命，達成自己的心願。
至於家庭，甚麼也沒有變。唯一不同是細佬每況越下，我不望他要做到我們認為要他做到的指定動作，我只是希望他不要再頹下去。現實是殘酷的，沒有會理會你煩惱甚麼，只看你有沒有指定經歷（工作經驗）。可做的是出盡奶媽力都要儲足實力，不想見人就先自己計劃怎樣增強自己實力，不要想太多。成個人板大佬在，不是要懶係語重心長，扮成熟。而是時間費了便費了，話之你有何理由就是費了。我唯一的希望是你一定要找到自己的理想，撻番著個計，做番個有理想的人，僅此。
暫時寫到這裡，留待下篇。
星期四, 3月 15, 2007
雜睇回憶學會事Ｉ
呢排做功課做到個人偶偶地、浮浮地又虛虛地，搞到悶到死。無時間創作新野過癮下之下，突然搵番四年前庭兄提議搞，當年在學會活動上屬全新的活動概念（我不知前輩級時代或其他本部有冇，起碼當年阿五無，或可說不普及）的廣播劇比賽。
當年未開始前，自告奮勇寫咗一個宣傳廣播劇比賽的宣傳廣播劇，現看回自己也認為不俗。雖當年被評太長，但在無學過寫劇又唔識一個為宣傳而寫的劇的技巧來說，憑著感覺和想像來寫，劇境故事算有架構；角色性格也切合現實中各位的性格，無需排練便可演繹各人的神緒，都真係算係咁。這個宣傳劇是在前一晚臨時建議給庭兄放在第二朝同樂日現場人聲演繹（當時有之後比賽的三組參賽者的其中四位上陣：翠茵、慧琪、嘉康、文健），前一晚用了一粒鐘時間寫的，效率比以後的每次寫劇也來得有效率好多。可惜的是當時太衝忙，又當日只在密麻麻的程序上涉了一個午飯後的休閑時段。基本上，飯後歸位的人不到一半，而歸位了的已飯氣攻心，懵盛盛，做完等如無做。之後那就一直擺電腦內留念而已...現既然有自己的扑，當然擺上來繼續我的無聊分享啦！：）
P.S.: 那種天花亂序的拼奏創作原來在那時已開始扎根了。
故事簡介：
故事講述老友鬼計雜貨鋪多年以來以賣其鋪頭才有特色的專sales好橋、有諗頭、好計的貨品成為街知巷聞的老字號。但因金融風暴後，巿場變得唯生主義，人人都要搵兩餐，就算有乜好計、好橋令生活過得快活些，好計、好橋都變得無需過問。幸好，得諸天的維護，東主琪及小伙計健無意中遇上一連幾個諸天善神，造就了他們從此改變了經營的策略，得到起死回生的仙丹，能否真的起死回生，就要看看他兩的造化了 . . .
角色身份：
琪：雜貨鋪老闆娘
健：雜貨鋪職員
康：魚蛋上巿公司主席
茵：巿場學研究員
劇本：
(收音機沙沙聲入)
琪： testing, testing 123, test . . . (第二段收音機沙沙聲持續三秒轉為tone好的電台)
琪：丫 . . . 收到喇喎。我話你聽丫，我家下喺閣樓個紙皮箱裏面搵緊一d往年開會時玩過好玩又新鮮又學到野嘅搞屎棍活動的存貨啊！開會成日得教學、遊戲、講話，好悶架嘛(係邊呢…)啊！搵到喇！好似五‧三搞話劇咁你話好唔好呢？喂 . . 點啫？(大喝一聲)喂 . . 你有冇聽我講架。熄鬼左佢丫嗱！(收音機停)
健：喂 . . 咪鬼熄啊，我有聽到你講架，你唔開番，冇得聽，點答你啫(收音機漫地開) . . . 話明五‧三先搞，咁梗係唔搞啦！
琪：阿健，我地老友鬼計雜貨鋪，喺香港都算得上係老字號丫，專門sale 有特色嘅好計、好橋嘅正貨比我地世界巿民搞行事用，其中一個特點貨色就係話劇，咁變相咪即係倒自己米啫。
健：老闆娘，你都睇到五‧三的一向有計仔的貨色喺冇計仔的情況下，都要擺喺閣樓舖塵啦！
康：喂 . . 頭先喺對面街寫字樓sale完魚蛋落嚟，就聽到你兩個大大聲諗計仔sale計仔喎！驚死無人知你地係老字號咁。
琪：丫，你個打蛋康，冇見你幾年啫，把口都仲係詩詞腔一論咀咁，唔通得把口就真係有計咩！
康：我就係冇乜好。吓，勝在口水多，喺魚巿場成日口多多，三唔識七都講足半日。幾年前就冇意中喺買魚搭爹時識左個高人傳授我打魚蛋的真傳，佢好有諗頭架，叫我走去冰島學打冰皮魚蛋。年零前修成正果時，又勝在把口衰，於是喺國際魚蛋界咪打出個名堂，遲d有可能集資上巿，到時記得買番幾手康仔記神打魚蛋國際(9578) . . .
琪：打蛋康，口水多多，又話有好多好橋好計，係咪真係有架？
康：哈 . . 哈 . . 唔好意思，咁我唯有出手助妳一臂之力啦！首先要分析番而家的情況，再觀察一下巿場的走勢，要突顯你地一灌的貨品特色，又要配合買家的需求，如果一味硬bang bang 死都要賣冇人要的貨色，就真係死寂一片。而家雖走勢唔好，但一定要逆境求生，先有出路。
茵：啊！唔好意思，打擾各位嘅對談。頭先路過時聽到呢位先生談到有關巿場的問題，我忍唔住要搭把口，請各位見諒。我本身係一位巿場學研究員，成日要四週圍到處去研究，上至巿場調查公司，下至街巿、老翻熱賣點，總之有巿場有生意的地方就要去同佢地做調查的專訪。啊！入番正題啦，如果要有特色的貨品做到家有一老，如有一寶咁嘅地步。首畢先必須對老人家愛護有加，時時關心老人家會唔會寂寞呀？會唔會悶親佢呀？夠唔夠錢使呀？各方面要考慮周詳，一個都不能少，話晒佢地都曾經係建立香港的重要核心，經歷過無數的風與浪，見識無數。總之多角度考慮巿場的需要同大擔創新先至有經驗，有左經驗先有計、先有賣點。如果唔係，淨係得過講係不設實際架！丫，唔同你地傾喇，又要趕下場調查，再見！
康：哈 . . .雖然唔知佢o翕乜，不過聽落就好有計！記住！要入到d好計、好橋的貨，經驗同創新係唔少得架，喂 . . 我都夠鐘見客喇，下次見面，整粒冰皮魚蛋過你。係咁先！
琪：阿健啊，我好似未見過冰皮魚蛋有得賣嘅？
健：哦 . . 可能佢d魚蛋要冷藏喺零下幾十度，香港普遍家庭雪櫃頂龍得嗰零下幾度，一買到手即溶，食鬼咩！
琪：丫，我終於開始有d sense 諗到點搞喇！d 諗頭返晒嚟，佢地一路講個陣，我就一路諗緊，既然過往d貨由有計變到冇計，最大的因素就係唔夠包裝同有獨特風格，香港嘅商品就係勝在有包裝又抄得夠獨特，咁香港先搞得咁繁榮。咁我地一於諗諗計，改改d 包裝。過往的教學、遊戲、專題、講話等模式要變變，加入一d 吸引客戶又創新的原素，例如試下搞下廣播劇囉。
健：一於搞廣播劇啦！雖然得把聲，但勝在其獨特性嘅only 聲音搞作，將大堆想講、想表達的訊息透過大氣傳播，人家只需開著收音機就能聽到，又合乎經濟原則，又比到人自我構造的想像空間，簡直係一石二鳥，咁客戶咪更容易達到世界巿民的標準囉！好，就去馬啦！仲唔贏晒咩！
琪：得個講字，要實際行動先真正掂嘅！一於將條橋包裝得精美d，售量實大大提昇！
健：下……老闆娘就咁啦。嗱！一於整舊廣播劇比賽啦，有比賽的成份作包裝，自然多人爭架啦，贏唔贏都有積分功德回贈，簡直好計啦！
琪：先收窄客路範圍，以街坊價試試熟客仔的反應，再作決定。
健：老闆娘，一於先試試阿五一眾青年部反應，如報名訂貨，即可獨得三句題目作積分累積喇！
(The Pancakes 廣告音樂 - Qoo)
--- 完 ---
星期三, 3月 07, 2007
肥西事務所 第二回：謝西宴
偉哥：「喂，西老闆，呢邊...」
肥西：「嘩嗄！偉哥，呢樹ｄ格局都幾別緻喎，樣樣野都的的式式，係冇介紹錯！」
偉哥：「梗係！呢度個老闆心思細密，樣樣都係人手精雕出嚟架。你聽下（手執一匙敲落個杯度），亨落去下下都雕雕聲，幾典雅啊！嗱嗱嗱！你睇吓...連老闆個心胸嘅襟章都夠晒精雕狹窄，突登搵人雕到個章陷入件衫入面，一睇就知物似主人型......所以我成日都幫襯，貪個格局夠抵雕吖嘛！」
肥西：「嘩...果然係零舍不同啊！吖！係呢，你用完隻大便品覺得點呀？」
偉哥：「吖！西老闆真係冇介紹錯啊吓...哎吔...掛住講，唔記得叫番幾碟撚手小菜答謝你添，呢度除咗嗰碟全城至出名的唐生菜，仲有ｄ煎炸小菜都好得，碟碟都鬆脆撚化，我食完啊都撚化咗唔少人，個個都拍爛手掌話好嘢！」
肥西：「咁就你拍板話事啦！」
偉哥：「我同呢間唐氏綜合盞的老闆唐生好熟架，熟到啊...（o翕到口唇邊，kick住）即...即好似熠熟咁嘅樣囉。喂...唐生，嘩...近排好撈啦，入咗幾手中柒化，個價標到成個標童咁，神台位價格。」
唐生：「唏！算係咁啦，最緊要夠錢買番支靚矛台飲。隻中國柒染化工近排轉晒用ｄ天然染料，支持綠色陣形，跟足上面指示，聽聽話話唔出錯，搏得歡心咯，個主流市場又受，咪磡磡聲標到神台價囉。」
偉哥：「嗱！放咗隻嘢，記住請我飲番幾杯啊，吓。哎吔！唔記得介紹，呢個係我嘅恩人，西老闆...」
肥西：「哈哈，唔好叫我老闆，周身唔聚財，叫我肥西得喇。」
唐生：「肥西吓嘛，嗯。」
肥西：「哦。」
偉哥：「你知唔知啊，佢介紹嗰隻大便品真係正到痺...哎吔，都係叫咗嘢先再講。」
唐生：「得啦，照舊嗰幾味吖嘛...家陣人客多，唔講喇，有機會先話我知有幾正啦，吓！」
偉哥：「得啦！唐生，我同你係如影知音，同一type人，心照啦！」
唐生：「(唔奈煩)啊...得啦！」
偉哥：「襯ｄ餸未嚟！講番隻產品。嘩......(口發出啫啫聲)真係冇得頂！食咗一個月之嘛，真係成個人通晒喎。血液流通得快，諗嘢都通咗好多。吖..個人平靜咗，發覺原來平日有好多嘢真係冇留意到，好似成日用住嘅八達通，以為齋係方便咗，原來係一個added value 的生活態度都不突止，仲要去四周圍嘟嘢時，見到好多人唔同嘅嘟嘢方法同態度，確實大開眼界。」
肥西：「呢個就係大便品嘅最強之處，通便。通過最便利嘅方法，獲得生活智慧，然後輕鬆方便咁做人囉。」
唐生：「吖，唔怪得阿偉哥仔你近排咁留意我ｄ成間鋪頭花雕裝修同ｄ杯碟啦！睇落呢隻嘢似乎幾啱我使喎，近排我唔知點解個人好似好悶咁呢...」
偉哥：「唐生，乜你都有嘢煩架咩？睇唔出喎，講嚟聽吓。」
唐生：「其實係咁嘅......」
星期四, 3月 01, 2007
肥西事務所 第一回：西檸偉事錄
肥西：「肥西事務所，有咩事快ｄ講...」
偉哥：「呢度係咪專係改造西人架？」
肥西：「係，我地有兩個精選食品，食完變忠人。一係髮嘩精大便品，二係臭西牛皮膠」
偉哥：「嘩吓？聽個名就知架勢啦！新聞紙都極力推介，呢道話：大便品，利之一瀉三千，可內服外塞。內服可排出心腸毒素心境好；外塞效力勁過甘油泵三千倍，一塞排毒迹門暢通三千，防三大便秘發生。裡應外合，積心成實。」
肥西：「當然秋勁啦！連特首近排都食啊！每逢發言前就鯨拍成樽落肚打底，以防佢唔麗嘅爛屎聲音塞住頭上本門，所以你見佢以往嘅態度都好自我，拆天星、廿年嚟最好、做好份工。咪就係冇食我哋嘅產品，o翕親嘢都食晒屎咁。」
偉哥：「咁似乎幾有效喎！你睇佢咁都肯出嚟搞大便論，似乎佢份人都開通咗唔少喎！」
肥西：「呢層當然啦！大便品嘅精妙之處在於幫你打通全身任篤二脈，改善血液同神經系統，加速新陳代謝。呢二脈對於一個人健唔健康呢…係好重要。要先清楚呢兩個脈落嘅運行路線圖同週期循環嘅時間表，仲有佢嘅特性。嗱！任脈呢屬陰嘅，即係任性。過往塞住咗呢，就好明顯表現喺唔理ｄ外間聲音之上，任性過晒火位，諸如聾咗一樣。而篤呢當然係陽啦，被人篤住嚟行。過往塞嗰陣，佢咪就係被中樞系統篤住背脊齋行，唔使用腦格。甚麼十一五行動綱領，你睇下，幾國產。家下呢…嗱！佢食咗我哋隻大便品之後，慢慢睇清呢兩脈特性。家下咪識得平衡點去玩任性同被篤，同時滿足兩方嘅需要。大便論正正係大便品嘅作用所致。」
偉哥：「嘩吓…佢家下真係逐步中西合壁喎。受西方訓練嘅佢逐步知道中方點玩，又學識點平衡中西兩方，調養陰陽兩極，走中間路線。呢個西人真係越嚟越明白咩叫效忠，佩服！老細，唔使講嘢，畀兩打大便品我。我都想做番個忠人，過往太揚了，陽氣過盛，係時候要積番ｄ陰德，學下兩邊平衡。若然效果好，我請你食全城至出名嘅唐生菜又點話。」
肥西：「嗱！係喇喎！記住裡應外合，效果先顯註。」
偉哥：「唏！你放心啦！我唔會再咁虛架喇，積心成實嘛...」
肥西：「多謝晒喇！咁下次再次介紹嗰隻臭西牛皮膠過你。」
偉哥：「好到極！再會！」
星期一, 2月 26, 2007
爆無聊處境劇場連載－肥西事務所．開波言！
日常凍檸悶生活過份悶爆，潛在賤能滿瀉，爆無聊的食字嚼思邊皮觀點常檀花一現。愛雜大乘炒作的我無渠可通的情況下，從過去ICQ到MSN，始留一毛，未嘗大毫。偶然一遇，貝殼浮現，便忍不著氣，隔日常爆，野野踩界，嚇人於半死狀態。
在大半個月前偶爾研修飯局中，廢o翁依舊，一語爆發，卻如常無聊了事。回歸日常，搞事之癢重拾那話語，越寫越好玩，遂激起久藏心底的寫故仔之意。家下終的起心肝，一嘗不定期處境創作，不定時出產。
先在msn上逐忽無聊現身，夠料完滿便集合在愚人扑留痕，敬請密切留意，哈！
預告：第一回－西檸偉事錄
訂閱：
文章 (Atom)
文章
